Arrestohet i dyshuari për masakrimin e 5-vjeçarit nga Miratoci

Preshevë, 26 shkurt - Pjesëtarët e policisë së Preshevës kanë dërguar te gjyqtari hetues në Gjykatën e Lartë të Vrajës një mashkull të moshës rreth 24 vjeçare nga fshati Miratoc (Refik Z.), si të dyshuar për vrasjen e 5-vjeçarit Nijazi Ibrahimi, ka njoftuar të premten stacioni policor në Vrajë, njoftojnë korrespondentet e agjencisë Presheva Jonë.

Më konkretisht, sipas këtyre burimeve, Refik Z. është kushëri i familjes Ibrahimi dhe komshiu i parë i saj në fshatin Miratoc. Sipas disa fshatarëve të këtushëm, bëhet fjalë për hakmarrje.

Edukatorja Muzafere I., shumë e tronditur, thotë se nuk ka vërejtur asgjë të dyshimtë kur vogëlushi të mërkurën fatale u nis drejt shtëpisë. Ajo thjesht nuk mund të besojë se dikush ka mundur aq pa shpirt të masakrojë fëmijën.

Sipas fshatarë, Nijazi dhe shoku i tij dolën nga çerdhja rreth orës 13, kurse pas tyre shkonte një person i rritur.

“Shoku i Nijazit hyri në një shitore në qendër dhe mbeti aty. Në shitore ai u ndal nga një i rritur, i cili filloi ta pyeste diçka dhe i ofroi ndonjë ëmbëlsirë. Kësisoj Nijaziu e vazhdoi rrugën drejt shtëpisë vetëm dhe gjatë atij rrugëtimi ai është vrarë”, pohon njëri nga fshatarët.

Vogëlushi Nijazi Ibrahimi është prerë në fyt dhe pastaj është lënë në një stallë të zbrazët të një komshiu.