Arrestohet edhe një paramilitar serb për krime lufte në Kosovë

Në Serbi është arrestuar të enjten një pjesëtar i njësive paramilitare “Çakejtë”, i cili akuzohet për krime kundër shqiptarëve, të kryera në fshatin Qyshk të Pejës më 14.05.1999.
I arrestuari A. S., i cili ishte në arrati prej ngritjes së aktakuzës para më shumë se tre muajve, i përket grupit prej 26 personash të kësaj njësie, të cilët akuzohen për krime kundër shqiptarëve. Më parë ishin arrestuar edhe nëntë anëtarë të kësaj njësie.

Ata dyshohen se në fshatin Qyshk kanë vrarë të paktën 41 shqiptarë, kanë përdhunuar dhe kanë plaçkitur si dhe kanë djegur shtëpi me qëllim frikësimin e popullatës shqiptare dhe ikjen e tyre për në Shqipëri, bën të ditur Prokuroria serbe për krime lufte. /qik/