Ka ndërruar jetë kirurgu Riza Binishi

Prishtinë, 28 shkurt – Njëri nga kirurgët e parë të Kosovës dhe doktor i shkencave të mjekësisë, Dr. Riza Binishi, ka ndërruar jetë në një klinikë të Berlinit, ku ndodhej për shërim nga një sëmundje e rëndë.
Kirurgu dhe profesori Riza Binishi u diplomua në Fakultetin e Mjekësisë të Beogradit, e pastaj specializoi kirurgjinë, që ndërkohë të marrë edhe titullin e doktorit të mjekësisë, për të edukuar breza të tëra mjekësh në Universitetin e Prishtinës. Ai ishte edhe dekan i Fakultetit të Mjekësisë dhe ushtroi funksione të rëndësishme në Klinikat Universitare të Prishtinës, prej nga në fund të viteve të tetëdhjeta u përjashtua për shkak të qëndrimeve të tij patriotike. Këto bindje ai i dëshmoi edhe gjatë luftës në Kosovë. Ai qëndroi nëpër male gjatë gjithë kohës së luftës në Zonën e Llapit dhe shpëtoi dhjetëra jetë luftëtarësh e civilësh të plagosur nga forcat serbe.
Para dy vjetësh pësoi një hemorragji cerebrale, për pasojë vuajti edhe sëmundje të tjera.
Riza Binishi u lind në Gjakovë më 1936.
Kufoma e Dr. Riza Binishit në ditët e ardhshme duhet të arrijë në Prishtinë me avion dhe varësisht nga dita e arritjes do të caktohet edhe data e varrimit.
Familjes Binishi kanë filluar t’i arrijnë telegrame ngushëllimi. Në ngushëllimet e AAK-së ndër të tjera theksohet se Dr. Binishi do të mbahet në mend përherë si njeri që nuk u kursye kurrë në shërbim të atdheut dhe të lirisë, dhe ishte në të gjitha kohët i gatshëm që të japë gjithçka në shërbim të tij, theksohet në telegram, dhe shtohet se
ai e dëshmoi edhe në vitet më të fundit të luftës sonë për liri, në radhët e Ushtrisë Çlirimtare të Kosovës, duke i shëruar plagët e ushtarëve të lirisë dhe duke qenë gjithmonë afër me popullatën civile në Zonën Operative të Llapit.