Clinton: Gadafi të shkojë menjëherë

Gjenevë, 28 shkurt - Sekretarja amerikane e Shtetit, Hillary Clinton tha se është koha që lideri i Libisë, Moamer Gadafi të shkojë menjëherë, pa kurrfarë vonese apo dhune të mëtejme.
Duke folur në Këshillin për të Drejtat e Njeriut të OKB-së në Gjenevë, Clinton i bëri thirrje bashkësisë ndërkombëtare që të bashkëpunojë në hapat e ardhshëm për të ndihmuar dhënien fund të krizës.
Ajo tha se qëndrimi i Washingtonit është se "asgjë nuk është jashtë tryezës" përderisa regjimi i Gadafit kërcënohet dhe vret civilë.
Gadafi, në anën tjetër, në përpjekje për të qetësuar qytetarët, ka urdhëruar qeverinë të japë para për të gjithë qytetarët e këtij vendi. Qytetarët u vendosën në radhë për të marrë nga 500 dinarë libianë. Shpërndarja nisi në kryeqytet, ku Gadafi ka ende kontrollin.