Vllasi: Pacolli menjëherë të tërhiqet

Në përputhje me vendimin e Gjykatës Kushtetuese të Kosovës, Behgjet Pacolli, duhet të lërë vendin e presidentit të Kosovës menjëherë, meqë ndryshe pasojë mund të jetë rënia e qeverisë dhe ndërprerja e dialogut me Beogradin.

Kështu deklaroi avokati Azem Vllasi për radion KiM. Duke interpretuar vendimin e Gjykatës Kushtetuese të Kosovës, sipas të cilit Behgjet Pacolli u zgjodh në mënyrë antikushtetuese, Vllasi tha se Kuvendi i Kosovës duhet t’i hyjë menjëherë rizgjedhjes së presidentit.

Kandidat mund të jetë sërish Pacolli, ka thënë Vllasi, duke shtuar se vendimi i Gjykatës Kushtetuese duhet të zgjidhet në mënyrë konstruktive, sepse në të kundërtën Kosova do të zhytej në krizë institucionale.

“Behgjet Pacolli, po nuk deshi të kandidohej sërish për president, mund të marrë vendim për dalje nga partneriteti i koalicionit me Thaçin, që mund të ketë për pasojë rënien e qeverisë, ashtu siç ndodhi në vjeshtë”, u shpreh Vllasi.

Sipas fjalëve të tij, situata mund të zgjidhet shumë më thjeshtë, duke i hyrë zgjedhjes së sërishme të të njëjtit kandidat për president.

Vllasi ka theksuar se Pacolli duhet të tërhiqet menjëherë nga posti i presidentit të Kosovës dhe që këtë detyrë t’ia lë kryetarit të Kuvendit deri në zgjedhjen përfundimtare.

Vllasi tha se rënia e qeverisë do të shkaktonte ndërprerjen e dialogut mes Kosovës e Serbisë, meqë palën kosovare e përfaqëson zëvendëkryeminstrja. Por, ka vlerësuar ai, nga këto bisedime edhe ashtu s’ka gjë, meqë në dialog është hyrë me nguti