FIFA vazhdon të kërkojë teknologjinë e duhur

Londër, 4 mars - FIFA do të vazhdojë të financojë më tepër provat e teknologjisë të vijës së golit, pasi që dhjetë sistemet e testuara kanë dështuar të plotësojnë kriteret e Federatës botërore të futbollit.
Provat janë urdhëruar nga presidenti i FIFA-s, Sepp Blatter, pasi që Federata botërore ishte kritikuar rëndë për gabimet e referëve që kishin ndodhur gjatë Botërorit 2010 të futbollit në Afrikë të Jugut.
Sistemet që u provuan në zyrat e FIFA-s muajin e kaluar - përfshirë edhe topin me mikroçip të "Adidasit", janë gjykuar si jo të shpejta dhe jo të sakta sa duhet.
Por sekretari i përgjithshëm i FIFA-s, Jerome Valcke, ka thënë të enjten se federata do të vazhdojë të hulumtojë derisa të gjejë teknologjinë e duhur të vijës së golit.
Bordi që vendos për ndryshimin e rregullave në futboll (IFAB) do të shqyrtojë dhjetë rezultatet në mbledhjen vjetore të shtunën në Celtic Manor të Uellsit.
Sipas kërkesave të IFAB-it, çdo ndihmë teknologjike duhet të tregojë brenda një sekonde dhe me saktësi të plotë nëse topi ka kaluar vijën e golit apo jo.
"Struktura e testeve nuk ka qenë ajo që kemi pritur, por ne e dimë se ku jemi. Sistemi 'Syri i Shqiponjës' që përdoret në tenis, po ashtu do të jetë temë e diskutimeve të shtunën", ka thënë Valcke.