PTK-ja i shpalli të humbura 15 milionë eurot para se të falimentonte BKP-ja

Prishtinë, 13 mars - Korporata publike e Postë-Telekomit i kishte shpallur të humbura 15 milionë eurot e depozituara në Bankën Kreditore, para se të shpallej falimentimi i kësaj banke, shkruan sot gazeta Koha Ditore.
Në raportet financiare të kësaj korporate të vitit 2005 është shënuar se PTK-ja ka humbur një shumë prej 15 milionë e 61 mijë eurosh për shkak të falimentimit të Bankës Kreditore të Prishtinës, me të cilën kishte marrëveshje për depozitimin e këtyre mjeteve deri më datën 31 dhjetor 2005. Raporti financiar që shpall të humbura milionat e PTK-së ishte nënshkruar nga ish-kryetari i Bordit të ndërmarrjes, Ilir Salihu, dhe nga shefi i financave në PTK, Cyril Rumbe. Kjo korporatë në pasqyrat financiare të vitit 2005, që ishin publikuar nga mesi i vitit 2006, kishte konstatuar se falimentimi i Bankës Kreditore të Prishtinës kishte ardhur si ngjarje pasuese pas mbylljes së vitit fiskal më 31 dhjetor të 2005-s. Sipas këtij raporti, PTK-ja kishte humbur llogaritë në Bankën Kreditore të Prishtinës më 31 dhjetor 2005, dhe po në këtë datë tepricat e balancës ishin zhvlerësuar totalisht.
Në raportet e Postë-Telekomit, të cilat i ka siguruar Koha Ditore, PTK-ja kishte në Bankën Kreditore të Prishtinës një shumë prej 12 milionë e 600 mijë eurosh si depozitë bankare afatshkurtër, si dhe 2 milionë e 461 mijë euro në llogarinë rrjedhëse të kësaj banke. Raportimi i PTK-së, i cili shpalli të humbur 15 milionë euro, është duke u hetuar nga Departamenti për Hetimin e Krimeve Financiare në Policinë e Kosovës.