Tërmeti në Japoni, më i shtrenjti në histori

Tokio, 14 mars – Edhe pse vlerësimi i dëmeve të shkaktuara nga tërmeti e cunami në Japoni nuk është ende përfundimtar, parashihet se mund të jetë tërmeti më i shtrenjtë në histori.
Ekziston frika se edhe ekipet e shpëtimit mund të zbulojnë numër më të madh të viktimave se deri tani.
Ekspertët kanë bërë vlerësimet preliminare të dëmeve. Kështu, dëmet e shkaktuara nga tërmeti, cunami e zjarret mund të arrijnë në të paktën 100 miliardë dollarë, duke përfshirë edhe 20 miliardë dollarë dëme në ndërtesa e infrastrukturë, kanë vlerësuar ekspertët e kompanisë Eqecat, transmetojnë agjencitë.
Tërmeti që ka shkaktuar më së shumti dëme ka ndodhur më 1995 në Kobe, ndërsa dëmet u vlerësuan në 100 miliardë dollarë.