Bilanci i ri: 25 000 të vdekur e të zhdukur në Japoni

Osaka, 23 mars – Sipas bilancit më të ri, 25 000 persona kanë vdekur apo janë zhdukur pas tërmetit dhe cunamit katastrofal të 11 marsit që kanë goditur Japoninë, njoftoi sot policia e këtij vendi.
Frika nga radioaktiviteti ka arritur deri në kryeqytetin Tokio, ku është lëshuar paralajmërimi që fëmijëve të mos u jepet uji nga ujësjellësi.
Sekretari i përgjithshëm i qeverisë japoneze, Yukio Edano ka thënë se njerëzit të cilët jetojnë jashtë rrethit prej 30 kilometrave nga centrali bërthamor Fukushima do të mund të jenë të ekspozuar ndaj rrezatimit prej 100 milisivertë apo edhe diç mçë shumë, gjë që paraqet sasinë për të cilën besohet se mund të jetë e lidhur me riskun e shtuar për sëmundjen e kancerit.
Në bazë të këtyre vlerësimeve Edano ka ftuar banorët që gjenden në drejtimin nga fry era prej Fukushimës, të qëndrojnë në banesa dhe të shmangin ekspozimin në ajër sa më gjatë të jetë e mundur, transmetoi agjencia Kyodo.
Qeveria e Japonisë ka njoftuar se niveli i jodit radioaktiv të gjetur në stabilimentet për pastrimin e ujit ka kaluar kufirin e caktuar për fëmijët.
Mbi ndërtesën ku gjendet reaktori 3 është parë tym i zi, kurse pas kësaj nga kjë ndërtesë janë evakuuar 11 punëtorë dhe është ndalur operacioni i spërkatjes me ujë nga zjarrfikëset.
Por, sipas agjencisë për siguri bërthamore dhe industriale, tymi nuk ka rezultuar me lirim të materialeve radioaktive dhe niveli i radiacionit nuk është rritur.