Ish-presidenti i Ukrainës hetohet për vrasjen e gazetarit

Kiev, 22 mars - Prokuroria ukrainase ka nisur hetimet ndaj ish-presidentit Leonid Kuchma, të dyshuar për pjesëmarrje në vrasjen e gazetarit Heorhi Gongazde.
Lajmin e bëri të ditur zëvendësprokurori i përgjithshëm, Renat Kuzmin, në një konferencë për media.
"Konfirmoj se kanë nisur hetimet ndaj ish-presidentit Kuchma, i cili dyshohet se ka abuzuar me pushtetin, duke iu dhënë urdhra të paligjshëm zyrtarëve të Ministrisë së Brendshme, të cilat kanë çuar në vrasjen e një gazetari", tha Kuzmin.
Vrasja e gazetarit Gongazde ka qenë një nga rastet kriminale më të ngarkuara politikisht në historinë post-sovjetike të vendit, transmeton REL.
Gongadze, një kritik i shpeshtë i Kuchmas, ishte rrëmbyer në shtator të vitit 2000. Trupi i tij pa kokë u gjet i varrosur në një pyll jashtë Kievit.