Limaj: Thaçi vetë ka përpiluar lista deputetësh dhe ministrash

Prishtinë, 24 mars - Ish- ministri i Transportit dhe Post Telekomunikacionit, Fatmir Limaj ka hedhur akuza të rënda në adresë të EULEX-it shantazhues, sipas tij, dhe ka komentuar një sërë aktualitetesh që po rëndojnë politikën kosovare kohët e fundit.
Në Rubikon, përballë Adriatik Kelmendit, deputeti i PDK-së Limaj, i dyshimtë për dhënie urdhri për vrasje gjatë luftës në Kosovë nga EULEX-i, ka thënë se hetimet dhe akuzat kundër tij vijnë pasi që nuk kishte pranuar të shantazhohej nga EULEX-i.
“Gjahu kundër meje është politik”, ka komentuar Limaj, duke shtuar se asnjëherë nuk ishte thirrur nga EULEX-i, as herën e parë, e as të dytën, për akuzat që i janë bërë për korrupsion, e tashti edhe për krime lufte.
Ai ka theksuar se këtë herë ishte paraqitur vetë në zyra të EULEX-it, ku kishte qëndruar 2 orë.
Limaj ndihet i ofenduar nga mënyra se si EULEX-i po sillet ndaj shtetit dhe institucioneve të Kosovës dhe u ka bërë thirrje qeveritarëve të sillen si institucionalistë.
Sipas tij, drejtësia kosovare nuk di gjë, gjithçka është në dorën e EULEX-it, i cili është në bashkëpunim të plotë me Serbinë.
Limaj ka theksuar se nuk mund të besojë që Bajram Rexhepi dhe Hajredin Kuçi nuk dinin asgjë për operacionin e EULEX-it kundër tij dhe ish-luftëtarëve të tjerë të UÇK-së.
Për kryetarin e PDK-së, Hashim Thaçi, njëherësh kryeministër, Limaj ka thënë se ai ka bërë vetë listën e deputetëve, listën e ministrave, se e kontrollon grupin parlamentar të PDK-së në Kuvend, ka bërë listën e zëvendësministrave dhe vetë ka vendos për të hyrë në koalicion me AKR-së, ngase, sipas tij, ai këtë të drejtë e ka marr nga kuvendi zgjedhor i partisë.
Limaj ka shtuar se do të kërkojnë përgjegjësi nga Thaçi nëse dështon në mandatin e tanishëm qeverisës.
“Në qoftë se dështon kryeministri, është përgjegjësi e tij dhe dihet çfarë është pastaj, përgjegjësisë para organeve të partisë, pra duhet të lëshojë rrugë”, ka thënë Limaj.
Limaj ka komentuar edhe bisedimet Kosovë-Serbi, të cilat sipas tij nuk janë aspak teknike dhe vetëm në të mirë të anëtarësimit të Serbisë në BE.