Facebook thjeshton konfiguracionet e privacisë

Gjatë ditës së djeshme, përfaqësuesit e Facebook kanë vendosur të reagojnë ndaj kritikave të ashpra të publikut dhe kanë bërë ndryshime të theksuara në konfiguracionet e privacisë brenda rrjetit. Përdoruesit tani e tutje do ta kenë më lehtë dhe më thjeshtë të udhëheqin me të gjitha konfiguracionet e profileve të tyre, faqeve të adhuruesve (fan pages) si dhe u është mundësuar kontroll më i mirë ndaj aplikacioneve.
Ashtu siç e ka zhvilluar Facebook shërbimin e vet, po ashtu është rritur sasia e konfiguracioneve për përdoruesit. Përdoruesit më së shumti ishin të brengosur për konfiguracionet e privacisë të cilat ishin bërë pothuajse të pamundura për t’u përcaktuar. Për të mbrojtur profilet e veta, përdoruesit është dashur të përcaktojnë 50 konfiguracione të ndryshme me gjithsej 170 opsione të ndryshme
Ndryshimet e reja me vete kanë sjellë thjeshtëzim të theksuar, kështu që tani është mundësuar përcaktimi i sasisë së informatave të cilat dëshironi t’i ndani me pjesën tjetër të përdoruesve të këtij rrjeti me vetëm disa klikime, mirëpo përdoruesit të cilët dëshirojnë të thellohen më shumë në to ende do t’u duhet të merren me konfiguracionet “e vjetra”.

Ndryshimet janë bërë edhe në faqet e adhuruesve, kështu që tani mund të përcaktohen konfiguracionet e tyre, e të gjitha aplikacionet e “palëve të treta” të cilat dëshirojnë të përdorin të dhënat e profileve të përdoruesve prej tani e tutje duhet të kërkojnë miratim paraprak.