AKR: Vendi është në krizë institucionale

AKR-ja ka vlerësuar të martën se Kosova është në një krizë institucionale, e cila kërkon angazhim dhe përkushtim të të gjithëve për tejkalimin e saj. Sipas kësaj partie në pushtet kjo krizë është shkaktuar pas aktgjykimit të fundit të Gjykatës Kushtetuese dhe interpretimeve kontradiktore që ajo dha më pas.
Kjo parti vlerëson se energjitë e klasës politike në Kosovë po shpenzohen në zgjidhjen e saj, dhe jo në problemet reale të vendit, të lidhura me jetën e qytetarit.

“Imazhi i vendit nuk përfiton asgjë prej kësaj krize, por përkundrazi humb. Ndaj duhet të vlerësohet dhe të analizohet çdo iniciativë, ngado që vjen, qoftë nga miqtë e Kosovës, apo nga parti politike, për ta zgjidhur krizën dhe për të mos e thelluar atë”, thuhet në një njoftim për media të AKR-së.

AKR-ja në këtë drejtim është e vendosur që të respektojë marrëveshjen e koalicionit dhe në këtë inkurajon te gjitha partitë politike që të arrijnë kompromis për proceset e ardhshme politike në Kosovë, por jo duke luajtur me emra presidentësh.

“AKR vlerëson se debatet për emrin e presidentit, janë pjesë e lojërave politike, dhe jo kundërshtime thelbësore mbi të. AKR-ja bën thirrje që të zhvillohen kontakte të mëtejshme midis partive politike parlamentare për të dalë nga kriza”, thuhet në njoftim.

Iniciativa e së hënës për takimin midis Hashim Thaçi dhe Isa Mustafa, me ndërmjetësimin e Behgjet Pacolli, sipas AKR-së, duhet të jetë vetëm hapi i parë në drejtim të gjetjes së një marrëveshjeje politike që përfshin ligjin zgjedhor, ndryshimet e Kushtetutës, etj. /Telegrafi/