Nuk qeveriset vendi vetëm nga një njeri

Vendit i duhet një politikë vizionare. Faktikisht Kosova ka
shumë politikanë, por pak ose hiç burrështetas thotë ish ministri Fatmir
Limaj.
Në pjesën e dytë të intervistës për Zërin, Limaj duke folur
rreth njohjeve dhe raporteve me FMN, theksoi se në përgjithësi gjendja
nuk është në nivelin e pritshëm që ne kemi nevojë. Por, sipas tij, këto
gjëra që po ndodhin në vend kanë impakte, kanë lidhje njëra me tjetrën,
sepse Kosova ende është shtet i brishtë dhe shteti i brishtë lehtë
lëndohet nga një proces, nga një veprim, nga një mosveprim.
“Duhet një angazhim i fuqishëm, i gjithanshëm për të ecur përpara.
Vendit tonë i duhet një politikë vizionare. Faktikisht Kosova ka shumë
politikanë, por pak ose hiç burrështetas. Kjo është që po ndodh me
vendin tonë. Neve na duhen burrështetas. Politikani për mua është
politikan ditor, i cili në mëngjes bën diçka dhe kërkon që në mbrëmje ta
korrë rezultatin. E bën një projekt në mëngjes dhe në mbrëmje para
televizorit i pret rezultatet e saj që ka bërë në mëngjes”, shprehet ai.
Duke komentuar kritikat e tij të para disa muajve lidhur me formimin e
qeverisë së re, Limaj tha se “Partia Demokratike e Kosovës është duke
udhëhequr me qeverinë edhe normalisht e mban përgjegjësinë. I ka fituar
zgjedhjet, e ka marrë mandatin edhe mban përgjegjësinë kryesore për
qeverisje. Çdo gjë e mirë që shkon në këtë vend, shkon në kosto të
PDK-së, por nëse shkon gabimisht, koston e paguan PDK-ja, dhe këtu është
ajo që PDK e kërkon përgjegjësinë, e unë e kërkoj përgjegjësinë
brendapërbrenda organeve të partisë për punën ose mospunën që bëhet në
qeveri, sepse ne e bartim barrën qeverisëse”. /Telegrafi/