Gashi e Makolli ministra të ardhshëm?

Drejtuesit e Partisë Demokratike të Kosovës dhe ata të Aleancës për Kosovën e Re kanë nisur të shtunën negociatat për riformatizimin e Qeverisë, konform zhvillimeve të fundit pasi që Behgjet Pacolli braktisi Presidencën, por nuk kanë folur konkretisht për ministritë shtesë që do t’i marrë Aleanca Kosova e Re- shkruan gazeta Express.
Sipas burimeve të gazetës, Hashim Thaçi dhe Behgjet Pacolli kanë rënë dakord për numrin e ministrive, të cilat do t’i marrë AKR dhe për zëvendësministrat, por nuk kanë folur se cilat ministri do t’i takojnë partnerit të vogël qeverisës.

AKR-së mund t’i jepet Ministria e Transportit apo edhe ajo e Arsimit, ndërsa cilado nga këto ministri që t’i jepet kësaj partie, ministër do të jetë Vegim Gashi. Ndërsa ministri tjetër i AKR-së duket se do të jetë Ibrahim Makolli, i cili nëse pranon ta marrë këtë pozitë, duhet ta lërë vendin e deputetit të Kuvendit të Kosovës.

Ndërkaq, për sa i përket emrave të zëvendësministrave, bëhet e ditur se në ato pozicione do të vendosen ekspertë të fushave përkatëse, e jo ndonjë prej zyrtarëve të lartë të kësaj partie. Ndërkohë, zyrtarisht nga AKR mohojnë se po flitet për emra.

“Dy ministria dhe tre zëvendësministra plus do t’i kemi në kabinetin qeveritar. Me marrëveshjen e re do të kemi gjithsejtë tetë poste të zëvendësministrave dhe pesë ministri. Besoj se brenda dy ditëve të ardhshme do të takohemi dhe do të dakordohemi edhe për postet tjera qeveritare”, ka deklaruar për gazetën nënkryetari i AKR-së, Ibrahim Makolli. /Telegrafi/