Makolli njoftohet me procedurat e hyrje-daljeve në ANP

Ministri i Diasporës i Republikës së Kosovës, Ibrahim Makolli, vizitoi Aeroportin Ndërkombëtar të Prishtinës - “Adem Jashari”, ku pati takim me drejtorin e ANP, Ferda Yakar. Qëllimi i këtij takimi ishte njoftimi për së afërmi me përgatitjet që ANP-ja i ka bërë në pritje të fluksit të shtuar të bashkatdhetarëve që vijnë në këtë periudhë në Kosovë për pushime verore.

Ministri Makolli u interesua për koordinimin e veprimeve në mes stafit të Aeroportit, Policisë kufitare dhe Doganave, në veçanti në shtimin e kapaciteteve në lehtësimin e procedurave të qarkullimit të udhëtarëve që vijnë nga diaspora.

“Ministria nuk dyshon në punën e mirë të menaxhmentit dhe stafit të aeroportit në këtë periudhë kur ka shtim të fluksit të bashkatdhetarëve tanë që vijnë në shtëpitë e tyre në Kosovë, por jemi të interesuar që mërgimtarëve tanë tu lehtësohen sa më shumë procedurat e kontrollimit të pasaportave dhe procedurat e tjera të nevojshme të kalimit në aeroport. Ne kërkojmë trajtim sa më korrekt të mërgimtarëve tanë që vijnë në shtëpitë e tyre”, tha me këtë rast ministri Makolli.

Nga ana e tij, drejtori i ANP-së “Adem Jashari”, Ferda Yakar, e njoftoi ministrin Makolli me përgatitjet e aeroportit në këtë kohë të pushimeve verore, kur edhe ka shtim të hyrje-daljeve të udhëtarëve. Ai tha se ANP-ja ka bërë shtim të kapacitetit të sigurisë në fushën që i takon aeroportit, dhe se është bërë koordinimi i punëve mes ANP-së, policisë kufitare dhe shërbimit doganor në lehtësimin e procedurave të hyrje-daljeve në aeroport. /Telegrafi/