Jahjaga njoftohet me procesin e decentralizimit

Presidentja e Republikës së Kosovës, Atifete Jahjaga u takua të martën me zëvendëskryeministrin e Kosovës, Slobodan Petrovic. Ky i fundit e njoftoi presidenten për përparimet në zbatimin e procesit të decentralizimit në Kosovë.

Në njoftimin për media thuhet se Petrovic e cilësoi procesin e decentralizimit si të rëndësishëm dhe tha se agjenda e realizimit të këtij procesi në veriun e vendit si dhe vendosja e një sistemi demokratik të udhëheqjes është përparësi e punës së tij.

Ai e njoftoi presidenten Jahjaga me punën e Ekipit Përgatitor Komunal dhe konsultimet e zhvilluara me përfaqësues të komunitetit në veri të Mitrovicës.

Presidentja Jahjaga e vlerësoi punën e Ministrisë së Pushtetit Lokal dhe ofroi mbështetjen e saj në kuadër të përgjegjësive kushtetuese dhe ligjore, për realizimin e procesit të decentralizimit.

Jahjaga ofroi mbështetjen e saj për një përparim më të theksuar në veri të Kosovës. /Telegrafi/