Krasniqi takoi homologun belg

Kryeparlamentari i Kosovës, Jakup Krasniqi u prit nga kryetari i Dhomës së Përfaqësuesve të Belgjikës, André Flahaut. Në këtë takim u konfirmuan marrëdhëniet e mira midis dy parlamenteve.
Kryetari i Kuvendit të Kosovës, Krasniqi e ftoi homologun e tij belg për një vizitë miqësore dhe zyrtare në Kosovë.

Në njoftimin e Kuvendit të Kosovës thuhet se në takim janë konfirmuar marrëdhëniet e mira midis dy parlamenteve, kryetarët e të cilëve edhe më parë kanë këmbyer vizita zyrtare.

Kryetari i Dhomës së Përfaqësuesve të Belgjikës, Flahaut, tha se e kishte vizituar më herët Kosovën, në cilësi të ministrit të Mbrojtjes dhe ishte befasuar me ndryshimet e mëdha pozitive që ka bërë vendi ynë.

Ai u interesua për aspekte të ndryshme të jetës në Kosovë, për të cilat e njoftoi kryetari Krasniqi.

Të dy kryetarët u pajtuan që të thellohen marrëdhëniet bilaterale ndërmjet parlamenteve, duke ditur se Kuvendi i Kosovës mund të përfitojë nga përvoja dhe tradita parlamentare belge. Ata theksuan nevojën e formimit të grupeve parlamentare të miqësisë dhe të takimeve të deputetëve të të dyja parlamenteve. /Telegrafi/