Kuçi takoi të burgosurit grevistë në Dubravë

Zëvendëskryeministri, njëherësh ministri i Drejtësisë, Hajredin
Kuçi, ka vizituar të burgosurit, të cilët të hënën në Qendrën
Korrektuese në Dubravë kanë filluar grevën e urisë, me kërkesë për
nxjerrjen e Ligjit për Amnisti.Pas këtij takimi, 12
përfaqësuesit e të burgosurve grevistë janë pajtuar që ministri Kuçi të
kërkojë nga presidentja e Republikës së Kosovës, Atifete Jahjaga,
kryetari i Kuvendit të Kosovës, Jakup Krasniqi, kryetari i Komisionit
për amandamentimin e Kushtetutës, Arsim Bajrami dhe të gjitha partitë
politike parlamentare, që në amandamentimin e Kushtetutës të përfshihet
edhe Instituti i amnistisë dhe më pas të procedohet me nxjerrjen e
Ligjit për Amnisti.
Në grevë janë të përfshirë shumica e kategorive të të burgosurve,
rreth 650 të burgosur në mesin e të cilëve edhe të moshuar dhe ata nën
trajtim mjekësor. /Telegrafi/