Beogradi nuk lejon të vizitohen të burgosurit shqiptarë

Orhan Rexhepi, kryetar i LKSH-së, njëherësh edhe këshilltar i Kuvendit komunal në Preshevë dhe Atulla Rexhepi, anëtarë i Kryesisë së BDL-së, si dhe anëtarë i Këshillit për të Drejtat e Njeriut në Preshevë, nuk u lejuan të mërkurën nga autoritetet serbe të vizitojnë nëntë të burgosurit shqiptarë në burgun qendror të Beogradit.
Kreu i LKSH-së theksoi se me gjithë se kanë patur leje nga trupi gjykues, sipas rregullave ligjore, nuk u lejua vizita e tyre, ndërkaq persona tjerë janë lejuar për vizita të ngjashme në të njëjtin burg, njofton agjencia INA.

Nëntë shqiptarë nga Lugina e Preshevës po mbahen në Burgun Qendrorë në Beograd, nën akuzën për krime lufte të shkaktuara ndaj serbëve dhe joshqiptarëve në verën e vitit 1999, në rajonin e Gjilanit, menjëherë pas hyrjes së Trupave të NATO-s në Kosovë.

Përfaqësuesit shqiptarë të Luginës së Preshevës kohë më parë me një apel u janë drejtuar disa organizatave për mbrojtjen e të drejtave të njeriut të vizitojnë të burgosurit shqiptarë që u arrestuan pa asnjë argument nga serbët më 26 dhjetor 2008 në Preshevë.

Në këtë apel theksohet se "në bazë të kopjeve të procesverbalit të bërë gjatë bastisjeve policore të shtëpive më 26.12.2008, por edhe në bazë të deklaratave të anëtarëve të familjeve, shihet se deklaratat e përfaqësuesve të lartë të Ministrisë së Punëve të Brendshme të Serbisë nuk janë të sakta se gjoja tek personat e burgosur janë gjetur armë!".

Këshilltarët e Kuvendeve Komunale të Preshevës, të Bujanocit dhe Medvegjës kërkojnë edhe "respektimin e amnistisë për të gjithë ish- pjesëtarët e UÇPMB-së" në Luginën e Preshevës. /INA/