Beogradi i ofron azil Gadafit?

Diplomatë të vendeve prijëse të NATO-s do t’i garantonin siguri Muamar
Gadafit (69) dhe familjes së tij, nëse emigron në Serbi, e cila është
ofruar vullnetarisht të pranojë liderin libian, ka publikuar dje
njoftimin e përjavshmja franceze autoritative “Le Canard Enchaine”, duke
u mbështetur në burime nga Qeveria e presidentit Nicolas Sarkozy.
Burimet nga Qeveria franceze e lidhin Muamar Gadafin me Serbinë.
“Ndërsa
aeroplanë francezë e britanikë përpiqen ta vrasin, diplomatët i
premtojnë (Gadafit) se do ta ruajnë nëse tërhiqet”, shkruan kjo gazetë.
Sipas
këtij burimi, negociatat me të kanë filluar para dy javësh, ndërkaq si
alternativë e strehimit të tij përmenden Emiratet e Bashkuara Arabe ose
“ndonjë vend i tretë sipas zgjedhjes së tij”.
Mirëpo, Qeveria e
Serbisë, sipas medieve të Beogradit, mohon shkrimin e të përjavshmes
franceze mbi mundësinë që Gadafi të marrë strehim në Serbi. “Pohimet se
Serbia i ka ofruar strehim Gadafit nuk kanë asnjë lidhje me realitetin”,
citon “Blic” shefin e Zyrës për bashkëpunim me media, Milivoje
Mihajloviqin.
Përmes gazetës “Le Canard Enchaine” gjatë 30 vjetëve
të fundit janë bërë publike një numër i madh skandalesh politike të
Qeverisë franceze. Ajo botohet në 450 mijë ekzemplarë dhe nuk boton fare
reklama.