Hoxhaj: Beogradi fsheh strukturat kriminale

Ministri i Punëve të Jashtme i Republikës së Kosovës, Enver Hoxhaj, në një intervistë për të përditshmen franceze “La Croix”, edhe një herë ka akuzuar Beogradin se po fsheh strukturat kriminale ilegale në veri të Kosovës.

Me këtë rast, Hoxhaj ka thënë se Serbia duhet të shpërbëjë strukturat ilegale dhe kriminale të saja në Kosovë, si parakusht për paqe, stabilitet dhe bashkëjetesë në Kosovë.

“Serbët janë të përfaqësuar në Qeverinë qendrore, Parlament dhe në gjashtë komuna. Plani i Ahtisaarit garanton të drejtat dhe përfaqësimin e minoritetit serb si askund tjetër në Evropë. Ky plan duhet të zbatohet në veri të Kosovës. Është koha që Serbia të shpërbëjë strukturat shtetërore dhe paramilitare”, ka shtuar Hoxhaj.

Ministri Hoxhaj në këtë intervistë po ashtu ka sqaruar vendimin e Qeverisë së Kosovës për masat e reciprocitetit ndaj mallrave serbe. Sipas Hoxhajt, Serbia në 3 vjetët e fundit ka eksportuar mallra në Kosovë, derisa Republika e Kosovës e ka pas të ndaluar të eksportoj në Serbi dhe përmes saj në Evropë.

“Kishte një asimetri. Gjatë pesë takimeve të para të dialogut, serbët kanë vonuar trajtimin e kësaj çështjeje. Me 21 korrik, ne shpresonim të flisnim për këtë, por ata bojkotuan dialogun. Pra, ne kemi vendosur të aplikojmë reciprocitetin: nëse Serbia nuk pranon mallrat nga Kosova, Kosova nuk pranon mallrat nga Serbia”. /Telegrafi/