Antikorrupsioni ia fsheh aksionet Isa Mustafës

Isa Mustafa mund të dyshojë në dorën e vet, nëse vendos t’i besojë Agjencisë Kundër Korrupsionit (AKK). Kreu i Prishtinës është mirë të shikojë edhe njëherë deklaratën e pasurisë, dhënë para zgjedhjeve të dhjetorit 2010, kur garonte për deputet të Kuvendit të Kosovës.

Aty, me ngjyrë të zezë mbi letër të bardhë, Mustafa ka shkruar se është aksionar me 49 për qind në kompaninë “Makcar”.

Mustafa këtë e ka shkruar qartë, edhe pse Ligji për parandalim të konfliktit të interesit nuk lejon që një zyrtar publik të ketë më shumë se 20 për qind të aksioneve në ndonjë kompani apo firmë private, shkruan Express.

Pavarësisht, se ky deklarim është publik dhe i bërë me vullnetin e tij, sipas të cilit del se Mustafa është edhe kryetari i dytë më i pasur nga të gjithë homologët e tij në vend, pas Pal Lekajt të Gjakovës, AKK-ja nuk mendon kështu.

Kjo agjenci pretendon se ka vërtetuar se përqindja e pjesëmarrjes me aksione në kompani private e Isa Mustafës nuk paraqet konflikt interesi.

Jetullah Aliu, drejtori i Departamentit të Parandalimit të Korrupsionit i AKK-së, ka thënë se agjencia e ka trajtuar rastin e kryetarit Mustafa nën dyshimin e bazuar për konflikt interesi. /Telegrafi/