KMDLNJ letër Mustafës për problemin e ngrohjes

Këshilli për Mbrojtjen e të Drejtave dhe Lirive të Njeriu (KMDLNJ) i ka dërguar letër kryetarit të komunës së Prishtinës, Isa Mustafa, në të cilën shprehet e shqetësuar lidhur me gjendjen e furnizimit me ngrohje në Prishtinë, ndërkaq fton që të ndërhyjnë në këtë çështje e cila seriozisht rrezikon mirëqenien dhe shëndetin e qytetarëve.

Në letrën drejtuar kryetarit të Prishtinës, KMDLNJ thekson se një gjendje e tillë për aq sa është e pashpjegueshme nga aspekti i mendjes së shëndoshë është edhe më e papranueshme në aspektin njerëzor dhe krejt kjo thuhet se është pasojë e papërgjegjësisë së menaxhmentit të ngrohtores së qytetit “Termokos”.

“Ka disa vite që kjo ngrohtore nuk po arrin të ofrojë furnizim me ngrohje për qytetarët e Prishtinës. Kjo ndërmarrje jo vetëm që nuk po arrin të ofrojë shërbimin që është e detyruar ta ofrojë por menaxhmentit i saj po sillet me papërgjegjësi përballë qytetarëve dhe institucioneve vitale të qytetit të Prishtinës. Kërcënimet me ngritje çmimi, shkyçje kolektive, ndërprerje të menjëhershme, kërkesa për para nga buxheti publik për KMDLNj paraqesin veprime shantazhi për qytetarin si dhe për institucionet e vendit në nivel lokal dhe në nivelin qendror”, thuhet në letër.

Sipas KMDLNJ-së, ndarja e mjeteve emergjente nga komuna dhe qeveria për këtë ndërmarrje, në kohën kur është kulmi i kohës së dimrit nuk është zgjidhje.

“’Termokos’ ka dështuar të ofrojë ngrohje edhe për QKU për të cilën thuhet se ka sistem të veçantë të ngrohjes e lëre më për konsumatorët e tjerë familjarë. Kjo lë të kuptohet se ky menaxhimet nuk ka aspak përgjegjësi për obligimet që ka përballë konsumatorëve primarë”, thuhet më tej.

KMDLNJ, ndër të tjera konsideron nëse kjo ndërmarrje punon me humbje dhe nuk ofron shërbime për konsumatorë është e dyshimtë dhe shumë e pamoralshme marrja e pagesave të dyfishta. Papërgjegjësia e kësaj ndërmarrje, thuhet se është njëkohësisht edhe papërgjegjësi e institucioneve mbikëqyrëse të komunës së Prishtinës.