KFOR-i do të luftojë strukturat kriminale në veri

Komandanti i KFOR-it, gjenerali gjerman Erhard Buhler, ka deklaruar se forcat paqeruajtëse së bashku me policinë e EULEX-it dhe atë kosovare do të luftojnë strukturat kriminale që veprojnë në veri të Kosovës. Ai tha se disa persona që veten e quajnë përfaqësues politik të serbëve në veri, dëshirojnë që gjendja në veri të mos ndryshojë, sepse kështu u shkon për shtati atyre.

“E gjithë kjo bëhet për pushtet dhe për para. Ata nuk dëshirojnë të humbasin fuqinë dhe pozicionin që kanë dhe dëshirojnë që të mbetet kjo situatë ku strukturat radikale dhe kriminale të tyre mund të funksionojnë”, ka thënë gjenerali Buhler, raporton Deutsche Welle. Ai ka thënë se forcat paqeruajtëse së bashku me policinë e misionit EULEX dhe policinë e Kosovës do të luftojnë strukturat kriminale në veri të Kosovës, sepse ato po ua shkatërrojnë jetën edhe shumicës së qytetarëve të ndershëm të asaj pjese.

Gjenerali gjerman Buhler, i cili këtë të premte përfundon mandatin, për t’i liruar vendin në krye të forcave paqeruajtëse një gjenerali tjetër gjerman Erhard Dreës, duke rikujtuar ngjarjet e 25 korrikut në veri të Kosovës ka thënë se situata në atë kohë ka qenë shumë e keqe, ku u shënuan shumë incidente me viktima. Ai ka thënë se në bazë të një vlerësimi të KFOR-it, shumica e njerëzve që jetojnë në atë pjesë dëshirojnë të kenë një jetë të qetë dhe normale, mirëpo, qetësia e tyre po prishet nga individ kriminel, të cilët në disa raste janë edhe të organizuar. “Këta kriminel dhe strukturat e tyre radikale u imponojnë popullatës lokale rregullat e tyre”, ka thënë Buhler.

Gjenerali Buher ka konfirmuar se NATO-ja në këtë fazë nuk planifikon reduktimin e mëtejmë të trupave të KFOR-it dhe e gjithë kjo për shkak të zhvillimeve që ndodhën në veri të Kosovës një muaj e gjysmë më parë. Ai ka thënë se NATO-ja ka një plan reduktimi për trupat në Kosovë. Por ky plan bazohet në vlerësimet e situatës së sigurisë dhe për sa kohë në veri të Kosovës të ketë një situatë të tensionuar, trupat nuk mund të reduktohen në këtë fazë. Sipas tij faza e ardhshme e reduktimit të trupave të KFOR-it mund të ndodhë në gjysmën e parë të vitit 2012 - nëse shënohet përmirësim i situatës së sigurisë në veri të Kosovës. /Telegrafi/