Serbia nuk heq dorë nga strukturat në veri të Kosovës

Serbia ka shprehur përkushtim që ta mbajë praninë e saj në pjesën veriore të Kosovës dhe i ka hedhur poshtë si të “papranueshme” insistimet gjermane, që të heq dorë nga institucionet atje si parakusht për statusin e kandidatit për pranim në Bashkimin Evropian.

“Institucionet e Serbisë janë të domosdoshme për komunitetin serb në Kosovë dhe ne as nuk do të heqim dorë nga këto institucione, e as nuk do t’i mbyllim ato, pasi kjo do të thoshte heqje dorë nga dëshira jonë për ta mbajtur Kosovën në Serbi”, ka deklaruar i ashtuquajtur ministër për Kosovën në Qeverinë e Serbisë, Goran Bogdanovic.

Sipas tij, të gjitha kërkesat për asgjësimin e “të ashtuquajturave struktura paralele” për serbët në Kosovë, janë “absolutisht të papranueshme”, njofton agjencia Beta, transmeton RFE.

Kancelarja gjermane, Angela Merkel, i tha një ditë më parë presidentit serb, Boris Tadic, se Serbia duhet t’i përmirësoj raportet me Kosovën dhe t’i heqë strukturat e saj paralele në pjesën veriore, nëse dëshiron të bëhet shtet kandidat për anëtarësim në Bashkimin Evropian, këtë vit. /Telegrafi/