Elita politike serbe, s’ka heqë dorë nga territori i Kosovës

James Hooper, analist dhe njohës i mirë i zhvillimeve në rajonin
e Ballkanit Perëndimor, thotë se Serbia në periudhën e ardhshme do të
jetë e preokupuar me çështjen e kufijve shtetërorë.“Mendoj
që elita politike serbe akoma nuk ka heqë dorë nga përpjekjet që të
bashkojë territore shtesë. Kjo ka të bëjë me pjesë të territorit të
Kosovës si dhe pjesë të territorit të BeH”, tha Hooper në një intervistë
për shërbimin serb të “Zërit të Amerikës”.
Sipas tij, gjithnjë ndërsa aspiratat e tilla ekzistojnë-do të
ekzistojë edhe rreziku nga shpërthimi i dhunës së re, luftës së re, si
dhe rreziku i minimit të lidhjeve të Beogradit me Bashkimin Evropian dhe
me SHBA-në, që kanë avancuar nga largimi i Milloshevic deri më sot”.
Megjithatë Hooper nuk beson që ambiciet e tilla territoriale janë
reale. “Mendoj se ato vetëm mund të shërbejnë si bazë politike për të
qëndruar dhe për ta mbajtur pushtetin brenda Serbisë. Bëhet fjalë për
qëndrime të elitës politike, e jo të njerëzve të zakonshëm”, thotë
Hooper.
Edhe pse elita politike flet për rrugën drejt Evropës, thotë ky
analist, dihet mirëfilli se tani kryesisht merret me çështjen e kufijve
shtetërorë, transmeton Qik.
“Kjo temë e cila deri vonë ishte objekt i diskutimeve në kuluaret
politike, ka dalë në publik madje nga ana e zëvendëskryeministrit të
qeverisë serbe Ivica Dacic”, tha Hooper.
Në fund ai rikujtoi se politika e cila shpie në të ardhmen
prosperuese evropiane të Serbisë nënkupton marrëdhënie të mira me
fqinjët, përfshirë Kosovën dhe BeH, tha analisti James Hooper, i cili
aktualisht ushtron detyrën e drejtorit të organizatës PILP e cila u
ofron shërbime juridike falas qeverive dhe shteteve të angazhuara në
negociata paqësore. /Telegrafi/