Krimi mbështetet nga Beogradi

Shpërthimi i dhunës në veri të Kosovës ka alarmuar zyrtarët e BE-së, në kohën kur Brukseli është duke vendosur nëse Serbia është apo nuk është e gatshme për të qenë kandidate për BE.

Ushtarët e NATO-s dhe diplomatët në BE publikisht thonë se territori i veriut të Kosovës udhëhiqet nga grupet serbe të krimit, interesi i të cilëve është ta mbajnë këtë territor në harresë, në mënyrë që të përfitojnë përmes kontrabandës. Ata privatisht pranojnë se këto grupe kanë mbështetje nga Beogradi, raporton “euobserver”. Madje, në korrik një snajperist vrau një polic shqiptar në këtë rajon, duke përdorur mjetin që policia dyshon të jetë armë e ushtrisë.

“Konflikti i ngrirë në veri të Kosovës e ndihmon Serbinë të destabilizojë shtetin pjesërisht të pranuar dhe të frenojë perspektivën e integrimeve të saj evropiane. Por, po ashtu provokon probleme të ngjashme në mesin e shqiptarëve në Maqedoni dhe Serbi, si dhe te Serbët e Bosnjës”.

Duke folur në Strasburg, shefja e BE-së për Politikë të Jashtme, Catherine Ashton, ka thënë: “Jam e brengosur për atë që po ndodhë në veriun e Kosovës, nëse jo më shumë se (konflikti arabo-izraelit)”. Ministri i Jashtëm suedez, Carl Bildf, ka shkruar në rrjetin social “twitter”: “Jam i brengosur për dhunën në veriun e Kosovës. Ne duhet ta mbështesim diplomacinë dhe ndërtimin e kujdesshëm të mirëbesimit”.

Dhuna e djeshme ndodhi disa javë para se Komisioni Evropian të vendosë nëse Serbia ka bërë apo nuk ka bërë sa duhet për ta merituar statusin e vendit kandidat për BE. /Telegrafi/