Shqiptarët, ‘pro’ bashkimit

Shqiptarët e dëshirojnë bashkimin kombëtar. Në bazë të një sondazhi të organizuar në faqen e fansave të Telegrafit në Facebook, 84 % e respondentëve kanë votuar ‘pro’ bashkimit të dy shteteve, Kosovës dhe Shqipërisë.
Kohëve të fundit disa organizata politike, përfshirë këtu edhe Lëvizjen ‘Vetëvendosje’, shtrojnë nevojën për bashkimin e Kosovës me Shqipërinë në një shtet të vetëm, ndërsa kjo sipas tyre duhej realizuar me anë të një referendumi.

Faqja e fansave në Facebook e portalit Telegrafi numëron 50 mijë anëtarë. Prej atyre që kanë votuar, 84 % janë ‘pro’ bashkimit të Kosovës me Shqipërinë, ndërsa 16 % e respondentëve të këtij sondazhi kanë preferuar që Kosova dhe Shqiperia të funksionojnë si shtete të ndara.

“Bashkimi ynë vendos ekuilibra të rinj në Ballkan, të domosdoshëm dhe jetikë për shqiptarët. Ai është një proces normal i cili kryhet mbi një shtrat tërësisht shqiptar. Këto ndryshime të natyrshme janë jetike dhe stabilizuese për vet Ballkanin”, u shpreh një prej votuesve ‘pro’ bashkimit, Roland Drini. Por, kishte dhe prej tyre të cilët ishin kundër.

Rezultatet e këtij sondazhi jo domosdoshmërisht shprehin vullnetin e të gjithë qytetarëve, por është pasqyrë për analistët politikë dhe veprimtarët e kësaj çështjeje, mbi opinionin e qytetarëve për një sagë e cila nuk do ta ketë fundin derisa të gjendet edhe pjesa e fundit e puzzle-it. /Telegrafi/