UNMIK-u cilësohet diskriminues për shqiptarët

Gjendja e sigurisë në Mitrovicë në dy javët e fundit ka qenë e
qetë, u vlerësua të hënën në takimin e rregullt të Komitetit për
vlerësimin e sigurisë që mbahet në kuadër të Drejtorisë komunale për
Mbrojtje dhe Shpëtim. Gjatë këtij takimi është theksuar se nuk ka pasur
ndonjë incident serioz që do të ndikonte në gjendjen e përgjithshme të
sigurisë.Nënkryetari i komunës, Riza Haziri tha se përkundër
faktit se në dy javët e fundit nuk ka pasur ndonjë incident serioz,
gjendja në veri vazhdon të mbetet e paqëndrueshme.
“Aktivitetet e strukturave paralele serbe paraqesin sfidë të vazhdueshme
për institucionet e rendit dhe të sigurisë, meqë ato veprojnë në
kundërshtim me ligjet dhe Kushtetutën e Republikës së Kosovës”, ka thënë
Haziri.
Ai përmendi edhe veprimet e zyrtarëve të UNMIK-ut në veri, të cilat
në vend të ndikimit konstruktiv kanë reflektim krejt të kundërt. Në këtë
kontekst, nënkryetari Haziri ceku një vendim të lëshuar nga
administrata e UNMIK-ut në veri për ndalimin e ndërtimit të një lokali
nga një qytetar shqiptar në Lagjen e Boshnjakëve.
Sipas tij, vazhdimisht në atë pjesë të qytetit administrata e
UNMIK-ut ka bërë një politikë jo parimore dhe të njëanshme. Si shembull
përmendi politikën e UNMIK-ut sa i përket rindërtimit të shtëpive të
djegura gjatë luftës.
“Serbët janë lejuar vazhdimisht të blejnë dhe të ndërtojnë në pronat e
shqiptarëve, ndërsa shqiptarët nuk janë lejuar as të rindërtojnë
shtëpitë e tyre të djegura”, theksoi Haziri.
Sa i përket vendimit të UNMIK-ut për ndalimin e ndërtimit të një
lokali nga një qytetar shqiptar në Lagjen e Boshnjakëve, ai tha se edhe
ky është një veprim që nuk relakson raportet ndëretnike, por ka efekt të
kundërt.
“Ne kemi dal në vendin e ngjarjes dhe i kemi sugjeruar atij qytetari
që të vazhdoj punën. Për lejet e ndërtimit nuk është kompetent UNMIK-u
por Komuna legale, deri në krijimin e komunës në veri sipas Pakos së
Ahtisaarit”, ka thënë nënkryetari Haziri. /Telegrafi/