Qeveria e do Shalën ambasador, Prokuroria e heton

Hetimet që thuhet se po zhvillohen ndaj ish ministrit të Ekonomisë dhe Financave, Ahmet Shala mund t’ia prishin atij marrjen e një posti të ri shtetëror-atë të ambasadorit të Kosovës në Washington.
Në rrugën e krijimit të një karriere të re në diplomaci, njeriut që udhëhoqi financat në mandatin e kaluar të qeverisë së Hashim Thaçit, i kanë dalë shpronësimi i disa hektarëve tokë gjatë kohës sa ai ka qenë në krye të agjencisë për privatizim, shkruan Koha Ditore.

Burime të besueshme ndërkombëtare i kanë thënë gazetës se eksiton një plan që Ahmet Shala të emërohet ambasador i Kosovës në Shtetet e Bashkuara të Amerikës në vend të ambasadorit aktual Avni Spahiu.

Por, siç ka shpjeguar i njëjti burim, emërimi nuk do të mund të realizohet nëse ndaj Shalës janë duke u bërë hetime serioze. Burime nga Prokuroria e Kosovës kanë bërë të ditur se Shala është duke u hetuar të paktën në një rast që ka të bëjë me shit-blerje pronash në mënyrë të paligjshme, që janë përligjur nga ish Agjencia Kosova e Mirëbesimit, agjenci që ka bërë privatizimin e pronave shoqërore para shpalljes së pavarësisë.

Shala ka qenë zëvendësdrejtor i AKM-së për disa vjet, gjatë së cilave pjesa më e madhe e pronave shoqërore janë shitur. Qindra hektarë tokë sipas burimeve janë përligjur nga ish Agjencia Kosovare e Mirëbesimit të Kosovës.

Numri më i madh i pronave të përvetësuara ka ndodhur në rajonin e Prishtinës dhe Lipjanit.

Planin për emërimin e Shalës si ambasador e kanë konfirmuar në kushte anonimiteti edhe burime të sigurta brenda Qeverisë së Kosovës, por zyrtarë të lartë në ekzekutiv janë habitur nga informatat për hetimet që po bëhen ndaj Shalës.

Një plan për dërgimin në shërbim diplomatik jashtë vendit është përfolur se ka ekzistuar edhe për ish ministrin e MTPT-së, Fatmir Limaj por edhe ai qe pamundësuar për shkak të hetimeve.

Gazeta ka provuar të marrë qëndrimin zyrtar të EULEX-it dhe të Qeverisë së Kosovës rreth kësaj çështjeje, por ka qenë e pamundur. /Telegrafi/