PDIU: Dogana në Barabar, na afron me Çamërinë

Partia për Drejtësi, Integrim dhe Unitet hapi të mërkurën fushatën elektorale në komunën Markat të Sarandës. Kryetari Shpëtim Idrizi prezantoi kandidatin për drejtues të komunës Ismail Murtaj, përfaqësues i PDIU-së.
Idrizi e cilësoi këtë vend si një frymëzim për zgjidhjen e çështjes çame dhe si një motiv për përkushtimin e mëtejshëm të PDIU-së për mbrojtjen e çështjes kombëtare.

Duke shprehur pritshmëritë më pozitive në rezultatin zgjedhor të komunës së Markatit, Idrizi ftoi qytetarët ta votojnë kandidatin çam, duke garantuar të gjithë përkushtimin për më shumë mundësi zhvillimi në këtë zonë.

Ndërsa kryetari i komunës, i cili rikandidon u zotua se do të vazhdojë implementimin e projekteve të nisura, por shtoi gjithashtu se brenda mandatit të dytë do të jetësojë të gjitha projektet për ndërtimin e qendrave të fshatrave të Komunës Markat. Murtaj premtoi se shumë shpejt do të bëhet realitet ndërtimi i pikës doganore në Barabar, e cila do të shkurtojë distancën gjeografike për të shkuar në Çamëri./Telegrafi/