BE: Vula vetëm “Dogana e Kosovës”

Në raundin e ri të dialogut ndërmjet Beogradit dhe Prishtinës do të prezantohet propozimi konkret i BE-së: vula e përgatitur në të cilën do të shkruante "Dogana e Kosovës", por pa kurrfarë embleme, flamuri ose steme. Kjo do të ishte oferta për negociatorët e Beogradit dhe Prishtinës, transmeton QIK-u shkrimin e gazetës së Beogradit "Veçernje novosti", që i referohet burimeve të besueshme diplomatike brenda BE-së

Sipas pritjeve të Evropës, kështu mund të arrihet kompromisi, pasi që të dyja palët emërtimin mund ta interpretojnë në mënyrën e vet. Për Serbinë kjo do të ishte "dogana e krahinës jugore të Kosovës", ndërsa për shqiptarët "dogana e shtetit të pavarur të Kosovës".

Gazeta citon burimin e saj nga Brukseli, i cili pohon se "në propozimin e vulës nuk shkruan 'republika', as që në të gjendet çfarëdo embleme, flamuri, apo steme të Kosovës".

Shefi i ekipit serb Borko Stefanoviq ka thënë po për këtë gazetë se për Serbinë është e pranushme vetëm ajo zgjidhje e cila do të ishte neutrale ndaj statusit dhe në pajtim me rezolutën 12 44.

- Nuk është e pranueshme që në vulë të shkruajë "Republika e Kosovës, as që vula të ketë stemën e Kosovës. Të gjitha dokumentet përcjellëse duhet të jenë neutrale ndaj statusit", ka thënë Stefanoviq.

Bashkëbiseduesi i gazetës nga Brukseli thotë se "zgjidhjen ideore" ua kanë dërguar të gjithëve. "UNMIK-u në parim e ka praunar, si neutrale ndaj statusit. Me të, ndonëse jo me dëshirë, paraprakisht është pajtuar edhe Prishtina, andaj presim që zgjidhja e tillë të jetë e pranueshme edhe për Beogradin", thotë sipas gazetës, burimi nga Brukseli.