Feith vazhdon detyrën në ICO, e përfundon atë në EUSR

Zyra për media e ICO-së qartësoi çështjen e mandateve të Përfaqësuesit Civil Ndërkombëtar (ICR) dhe Përfaqësuesit Special të Bashkimit Evropian (EUSR) pas disa raportimeve.
Në njoftimin për media të ICO-së thuhet se mandati i Pieter Feith si ICR u rikonfirmua nga Grupi Drejtues Ndërkombëtar në takimin e mbajtur në shkurt të vitit 2011 dhe vazhdon për një kohë të pacaktuar.

“Gjatë vitit që kemi përpara ICO-ja do të vazhdojë punën për zbatimin e Propozimit Gjithëpërfshirës për Statusin (PGJS) së bashku me institucionet e Kosovës. Në afat të gjatë, fundi do të jetë mbyllja e ICO-së, megjithatë ky është një vendim vetëm i Grupit Drejtues Ndërkombëtar, pas marrjes në konsiderim të progresit të arritur”, thuhet një njoftim.

Më tej, bëhet e ditur se mandati i Pieter Feith si EUSR përfundon më 30 prill 2011.

“Diskutimet janë në vazhdim në Bruksel për rregullimin e ardhshëm të pranisë së BE-së në Kosovë duke marrë parasysh Traktatin e Lisbonës”, njofton ICO. /Telegrafi/