Në EULEX vendos veç shefi

Zyrtarët e misionit të BE-së për sundimin e ligjit kanë edhe një strukturë të veçantë, nga e cila duhet marrë leje për ta bërë aksionin, shkruan Koha Ditore. Gjenerali ushtarak në krye të misionit duhet të informohet për çdo planifikim të prokurorëve dhe vendimeve të gjykatësve.

Konsultimet me shefin Xavier Bout de Marnhac bëhen paradite. Prokurori i çështjes i shoqëruar nga kryeprokurori i misionit ose nga kryeprokurorja e Prokurorisë Speciale të Republikës së Kosovës dhe zyrtarët e tjerë përgjegjës për një aksion, ia tregojnë në detaje planifikimet e tyre shefit të misionit.

Ata e lëshojnë zyrën vetëm nëse kanë marrë “po”-në ose “jo”-në e tij. Deri vonë, shefi i misionit ka qenë sensitiv kryesisht për veprimet në veri, por së fundi, sipas burimeve brenda misionit, sensitiviteti i tij është rritur edhe në aksionet që kanë të bëjnë me korrupsionin dhe krimet tjera.

Struktura të veçanta të lejedhënies për veprimet e prokurorëve, hetuesve e gjykatësve nuk ekzistojnë në asnjë sistem tjetër të drejtësisë.

Në një intervistë të mëhershme për Kohën Ditore i pyetur për pavarësinë e gjykatësve dhe prokurorëve të EULEX-it, shefi i misionit pati thënë se prokurorët janë autonomë, e gjykatësit janë të pavarur.

Zyrtarët e EULEX-it nuk pranojnë të komentojnë nëse struktura e llogaridhënies ndaj shefit nënkupton ndërhyrjen e një mekanizmi tjetër në pavarësinë e gjykatësve dhe të prokurorëve. /Telegrafi/