Mbi 65 të vdekur si pasojë e një aksidenti hekurudhor në Indi

Si pasojë e një aksidenti hekurudhor në shtetin federal të Indisë lindore Bengali Perëndimor humbën jetën mbi 65 vetë. Sipas të dhënave të mjekëve u plagosën edhe 200 udhëtarë të tjerë, shumë prej tyre rëndë.
Siç njoftoi një zëdhënës i shoqërisë hekurudhore treni i shpejtë ekspres i natës po udhëtonte nga Kalkuta në Mumbai kur është goditur nga një shpërthim i rëndë. Si pasojë e shpërthimit 13 vagonë kanë dalë nga binarët. Disa prej tyre kanë mbetur në binarët paralelë ku janë goditur nga një tren i mallrave që po vinte nga drejtimi i kundërt.

Autoritetet dyshojnë se bëhet fjalë për një sulm të rebelëve maoistë. Ata kanë shpeshtuar sulmet e tyre pasi që forcat indiane të sigurisë kanë nisur një ofensivë kundër kryengritësve. /DW/