Kosova, e 64-ta në botë për nga lumturia

Sipas agjencisë hulumtuese “Gallup”, pesë shtetet më të lumtura në botë janë Danimarka, Suedia, Kanada, Australia dhe Finlanda.
“Banorët e shteteve skandinave me të vërtetë jetojnë mirë. Njëra nga teoritë se pse kjo ndodh është se kërkesat e tyre bazë janë të përmbushura në mënyrën më të mirë se sa në shtetet tjera”, ka thënë Jim Harter nga Gallup, i cili ka qenë udhëheqës i këtij hulumtimi.

Këta hulumtues, për të caktuar shkallën e lumturisë kanë anketuar me mijëra vetë, duke hulumtuar për dy lloje të lumturisë - kënaqësinë e përgjithshme me jetën dhe kënaqësia në bazë ditore. Ata kanë konstatuar një zbulim të pritur: paratë luajnë rolin kryesor në kënaqësinë e banorëve të të gjithë shteteve.

Sipas kësaj radhitje, banorët e Kosovës janë të radhitur në vendin e 64-të, tri vende më lartë se ata në Shqipëri që radhiten në vendin e 67-të.

Sa i përket shteteve tjera të Ballkanit, banorët e Sllovenisë radhiten në vendin e 38-të, Mali të zi në vendin e 56-të, Kroacisë në vendin e 59-të, Rumunia në vendin e 76-të, Hungaria në vendin 85-të, Serbia në vendin e 96-të, Bosnja në vendin e 99-të, Maqedonia në vendin e 100-të dhe Bullgaria në vendin e 106-të. /Zëri/Telegrafi/