Turqia shkatërron monumentin e pajtimit me Armeninë

Ankara, 16 prill – Punëtorët turq kanë filluar të martën punimet për shkatërrimin e skulpturës gjigante të ndërtuar për promovimin e pajtimit ndërmjet Turqisë dhe Armenisë. Televizionet turke transmetuan pamjet e vinçave që zbrisnin poshtë njërën prej dy kokave të skulpturës 35-metrash prej guri, që simbolizonte figurën e ndarë njerëzore, në afërsi të kufirit ndërmjet dy shteteve.
Monumenti gjigant është kritikuar në Turqi, për shkak se i vë hije një tempulli islamik në afërsi. Gjatë një vizite në këtë vend në janar, kryeministri turk, Recep Tayyip Erdogan, e quajti atë “të çuditshëm”, duke nxitur veprimet e zyrtarëve lokalë për heqjen e tij. Të gjitha tentativat e artistëve për ta shpëtuar monumentin kanë rezultuar të pasuksesshme.