Shkupi i painteresuar për lehtësime kufitare

Maqedonia ende nuk tregon kurrfarë disponimi për lehtësim të udhëtimit të qytetarëve të Shqipërisë dhe Kosovës, edhe pse presidenti shqiptar Bamir Topi dhe ish presidenti kosovar Fatmir Sejdiu para dy viteve dolën me ide për formimin e një “mini-shengeni” ballkanik.

Përderisa Shqipëria dhe Kosova janë marrë vesh që qytetarët e dy vendeve t'i nënshtrohen vetëm një kontrolli në hyrje ose dalje në tri pikat e kalimit kufitar, Morinë, Qafë Prush dhe Qafë Morinë, prej Ministrisë maqedonase të Punëve të Brendshme nuk ka asnjë shenjë se së shpejti lehtësimi i udhëtimit mund të ndodhë edhe drejt Maqedonisë.

“Maqedonia për momentin është e interesuar për lehtësime kufitare me Serbinë edhe pse realisht prioritet duhet të ketë lehtësimi i regjimit kufitar me Shqipërinë dhe Kosovën. Si duket MPB maqedonase më tepër i kushton rëndësi miqësisë tradicionale me Serbinë, sesa interesit të qytetarëve të vet”, citon Zhurnal vlerësimet analistëve, të cilët thirren në lidhjet e shumta farefisnore mes shqiptarëve të Maqedonisë dhe Kosovës, por edhe me ata të Shqipërisë.

Ndërkohë, gjatë vizitës së fundit në Shkup, ministri i Brendshëm i Kosovës, Bajram Rexhepi, u shpreh optimist se qytetarët e dy vendeve së shpejti do të udhëtojnë me letërnjoftime, mirëpo ministrja maqedonase Gordana Jankulovska u shpreh më e rezervuar duke thënë se paraprakisht duhet të plotësohen disa kushte që i kërkon BE. Mirëpo, analistët shqiptarë në Shkup thonë se në këtë rast nuk janë pengesë standardet e BE-së, por mungesa e disponimit të vërtetë të Shkupit zyrtar për të jetësuar nismat nga Tirana dhe Prishtina. /Telegrafi/