Veprimet e policisë kanë qenë politike

Kryetari i Prishtinës dhe i Lidhjes Demokratike të Kosovës thotë se nuk e ka krahasuar me UDB-në gjithë Policinë e Kosovës, por një pjesë të saj që, siç shprehet, ia ka zënë dyert Komunës së Prishtinës.

Kryetari i Prishtinës në intervistën për Radio Kosovën, arsyeton krahasimin që i ka bërë veprimeve të një pjese të Policisë së Kosovës me ato të UDB-së, i bindur se kjo është pjesë e shantazhit politik.

“Këtu më së paku ka të bëjë me, themi në rastin e Prishtinës, veprime që janë thjesht ligjore. Unë i konsideroj këto që janë veprime politike, që janë shantazhe, të cilat po bëhen ndaj Komunës së Prishtinës dhe, për këtë arsye, e kam thënë edhe në media, sepse, nuk dëshiroj që elemente të shtetit policor të na lajmërohen tek ne”, tha Mustafa.

Ndonëse ka akuzuar për infiltrimin e elementeve të SHIK-ut në polici, Mustafa thotë se iniciativa e deputetit të AAK-së, Burim Ramadani për të ngritur komision hetimor për SHIK-un nga Kuvendi i Kosovës, është e gabuar pasi kjo organizatë, sipas tij, nuk ka qenë legale dhe me të duhet të merren organet e drejtësisë.

Ndryshe, Mustafa beson në realizimin e marrëveshjes me PDK-në dhe AKR-në, kurse kritikat nga opozita i konsideron pjesë e luftës politike, pasi ato, duke qenë pjesë e komisioneve, po implementojnë marrëveshjen. E kritikat e paraardhësit të tij, Fatmir Sejdiu, Mustafa i sheh si e drejtë e shprehjes së mendimit.

Kryetari i LDK-së, Isa Mustafa thotë se partia e tij do të vazhdojë ta luaj fuqishëm rolin e saj opozitar, ndërsa shprehet se ende është herët të flitet për punën e Qeverisë-Thaçi 2. Ndërsa, për programin për zhvillim ekonomik të hartuar në Bullgari, ai thotë se nuk është program, por teza të një programi me parametra vështirë të arritshëm. /Telegrafi/