Zgjohu dënon ndërhyrjen e policisë

Lëvizja Qytetare “Zgjohu” mbështet grupin e tifozëve Plisat nga Prishtina dhe dënon ashpër ndërhyrjen brutale dhe të pajustifikuar të njësitit të policisë së Kosovës të ardhur nga Mitrovica- thuhet në një reagim të kësaj lëvizjeje.
Më tej thuhet se Pamjet pas ndeshjes basketbollistike Prishtina – Bambi ju rikujtuan shqiptarëve skenat e represionit të forcave serbe mbi shqiptarët duke tentuar t’i disiplinojnë ata nëpërmjet të abuzimit me institucionet e shtetit dhe aparatin ndëshkues, policinë. Sipas kësaj lëvizjeje, Plisat, bashkë me vëllezërit e tyre nga Shkupi dhe Tirana janë në ballë të proceseve kombëtare duke dhënë kontribut të pamohueshëm në përafrimin e Prishtinës me Tiranën dhe Shkupin duke i bërë një.

"Dhuna e pajustifikueshme e policisë ndaj fansave të pafajshëm, arrestimet skandaloze të ish ushtarëve të UÇK-së, deklaratat e pamatura të ministrit Rexhepi dhe paligjësia në veri të Mitrovicës dëshmojnë frustracionin institucional të Ministrisë së Punëve të Brendshme që po përcjell virusin e impotencës politike drejt policisë së Kosovës”, thuhet në reagimin.

Lëvizja “Zgjohu” në Prishtinë, me solidarizim të plotë nga zyra e “Zgjohu” në Shkup dhe tifozët Shvercerat Shkup, solidarizohet me Plisat Prishtinë dhe kërkon që përgjegjësi nga policia e Kosovës dhe ndëshkim të urdhëruesve të këtij intervenimi skandaloz kundër djemve dhe vajzave shqiptare në palestrën e Pallatit të Rinisë dhe Sporteve në Prishtinë. /Zhurnal/Telegraf