Kuvendi s’ka ide për helikopterët e autoblindat e policisë

Kryetari i Kuvendit, Jakup Krasniqi, nuk e di nëse kryeministri Hashim Thaçi ka planifikuar të pajisë policinë me helikopterë e autoblinda. Nuk e mohon se kjo mund të jetë e vërtetë, por thotë se zyrtarisht nuk ka pranuar ndonjë kërkesë nga kryeministri që Kuvendi të japë pëlqimin për këto blerje. “Ne në Kuvend administrojmë letra e jo fjalë”, ka thënë Krasniqi.

Javën e kaluar, “Koha Ditore” ka mësuar nga burimet e saj në Qeveri dhe në polici se shefi i Qeverisë e ka pasur në plan që të kërkojë leje nga Kuvendi për të blerë pajisje të sofistikuara për Policinë e Kosovës, menjëherë pas aksionit policor për marrjen nën kontroll të pikave doganore në Jarinjë dhe Bërnjak.

Nga zyrtarë të lartë institucionalë është thënë se bëhet fjalë për blerjen e dy helikopterëve dhe të dhjetë automjeteve të blinduara. Ata kanë konfirmuar se plani për përforcimin e logjistikës dhe të operativës së policisë, që tashmë është i miratuar, pritet që ditëve në vijim t’i prezantohet Kuvendit, kur ta fillojë sesionin vjeshtor të punës.

Meqë vlera e helikopterëve dhe e autoblindave mund të kalojë 25 për qind të buxhetit të përgjithshëm të MPB-së, atëherë në bazë të ligjeve në fuqi duhet që vendimin përfundimtar për këto blerje ta japë Kuvendi i Kosovës.

“Sa herë që Kuvendi do të ketë kërkesa që duhet të vihet në lëvizje, Kuvendi do të vihet në lëvizje. Me kushtetutë edhe presidentja, edhe kryeministri, edhe 40 deputetë kanë të drejtë për të kërkuar seancë të jashtëzakonshme. Por asnjë kërkesë nuk ka ardhur administrativisht në Kuvend”, ka thënë Krasniqi. /Telegrafi/