ZGJOHU! nismë për bashkimin e faktorit politik shqiptar

Lëvizja “ZGJOHU!” prezantoi të premten nismën e saj “Koha për Bashkim” për partneritet dhe unifikim midis partive politike shqiptare në Maqedoni për zgjedhjet e reja.
“Ne kemi gjykuar si më se të nevojshme të themelojmë dhe regjistrojmë listën e pavarur të quajtur Koha për Bashkim e cila do të hap forum me partitë shqiptare dhe do t'ju ofrojë partneritet nëpërmjet përpjekjeve tona për të bashkuar sa më tepër parti politike shqiptare në zgjedhjet e qershorit. Gjykojmë që, në rrethanat e sotme, vota shqiptare nuk duhet të fragmentohet dhe të humb në fuqi dhe për këtë arsye kemi vendosur të bashkëpunojmë me partitë politike për ta institucionalizuar hisen tonë, por po që se nuk arrijmë gjuhë të përbashkët me partitë politike, ne në asnjë mënyrë nuk do të kontribuojmë në përçarjen e votës, por do të bëhemi kritikuesi i tyre më i madh”, theksoi kryetari i “ZGJOHU!”, Artan Grubi, informon agjencia e lajmeve INA.

Ai bëri thirrje që të gjithë shqiptarët në Maqedoni që të dalin masovikisht në këto zgjedhje si asnjëherë më parë dhe të mbështesin këtë përpjekje.

ZGJOHU! nënvizon se në këtë iniciativë janë të kyçur aktivistë të shoqërisë civile, intelektualë të rinj, studentë, përfaqësues të biznesit, ku është vendosur kyçja e drejtpërdrejt në procesin zgjedhor në përpjekje për unifikimin dhe përqendrimin e votës shqiptare.

“Ne do të nisim bisedime me të gjitha partitë politike shqiptare, do t'ju ofrojmë mbështetjen dhe kapacitetet tona dhe do të kërkojmë që bashkërisht ta faktorizojmë votën shqiptare dhe me forca dhe fytyra të reja ta marrim hisen që na takon”, theksoi Artan Grubi.

Nisma e Lëvizjes “ZGJOHU!” është ndërmarrë në prag të shënimit të 5 vjetorit të funksionimit të saj. /Telegrafi/