Pritet frymë e re parlamentare nga deputetët e rinj

Instituti Demokratik i Kosovës njoftoi se në këtë përbërje të
legjislativit, më tepër se 2/3 apo 83 deputetë janë për herë të parë
përfaqësues të zgjedhur në Kuvendin e Kosovës. Kështu u tha
në tryezën me temë “Legjislatura e IV-të - Çfarë të reja solli”? të
organizuar nga Instituti Demokratik i Kosovës, ku deputetët e rinj të
Kuvendit kanë paraqitur punën dhe planet e tyre në këtë legjislaturë.
Në njoftimin për media bëhet e ditur se KDI ka publikuar një Punim që
përfshin të dhënat biografike të deputetëve të Legjislaturës së IV si
dhe strukturën politike, etnike, gjeografike, gjinore dhe profesionale
të kësaj legjislature.
Driton Selmanaj nga KDI ka prezantuar para të pranishmëve punimin e
KDI-së, duke potencuar se në këtë përbërje të legjislativit, më tepër se
2/3 apo 83 deputetë janë për herë të parë përfaqësues të zgjedhur në
Kuvendin e Kosovës.
“Ndërrimi kaq i madh i strukturës përfaqësuese, me të drejt shton
edhe pritjet e qytetarëve për një frymë të re të jetës parlamentare”, ka
thënë Selmanaj.
Panelisti, Berat Buzhala, deputet i ri nga Partia Demokratike e
Kosovës ka thënë se përqindja e lartë e deputetëve edhe në moshë të re
vjen si rrjedhojë e rritjes së ndërgjegjes së liderëve. “Ne si deputetë
të rinj duhet të kujdesemi për kategoritë e rrezikuara, si
homoseksualët, minoritetet, personat me aftësi të kufizuar, etj”, ka
thënë Buzhala.
Panelisti tjetër, Arben Gashi nga Lidhja Demokratike e Kosovës, ka
thënë se zgjedhjet e fundit kanë pasur prurje kualitative në
përgjithësi. Sipas tij, nëse bëhet një analizë e punës së deritashme, ka
pasur rritje të efikasitetit të punës në Kuvend.
Deputetja e Lëvizjes Vetëvendosje, panelistja Alma Lama ka përmendur
anët pozitive dhe negative të përbërjes së re të kësaj legjislature. Ajo
ka thënë se mungesa e përvojës konsiderohet si negative. “83 deputetët e
rinj kanë anët pozitive sepse ka një frymë dhe dinamikë të re. Një anë
shumë negative është se në këtë legjislaturë ka disa deputetë që janë
nën hetime”, ka thënë Lama.
Ndërkohë, më shumë kritik është paraqitur panelisti i radhës,
gazetari Agron Halitaj, i cili ka vlerësuar se deri më tani, kjo
legjislaturë nuk ka treguar shumë punë. Për më tepër ai ka thënë se
deputetët e rinj vijnë nga një palë zgjedhje me shumë parregullsi. Ai ka
thënë po ashtu se në këtë legjislaturë ka mazhorancë të brishtë dhe
opozitë të pa strukturuar.
Deputeti i Koalicionit për Kosovën e Re, Amir Ahmeti ndërkohë ka kërkuar
që deputetët e rinj të jenë deputet dhe përfaqësues të votuesve të
tyre.
Në debat janë diskutuar edhe tema të tjera që kryesisht kanë të bëjnë
me përfaqësimin sa më të mirë të qytetarëve në Kuvendin e Kosovës.
/Telegrafi/