Takohen kryetarët e komisioneve parlamentare

Përshpejtimi i punëve rreth shqyrtimit e aprovimit të projektligjeve që ndërlidhen me Raportin e Progresit, ishte temë themelore e mbledhjes me kryetarët e komisioneve të Kuvendit të Kosovës, që e kryesoi nënkryetari i Kuvendit të Kosovës, Xhavit Haliti.
Para deputetëve presin për t’ u aprovuar 13 projektligje, që tashmë kanë kaluar leximin e parë, ndërsa dy sosh presin të dalin në shqyrtim të parë.

Ndërkohë, nga Qeveria e Kosovës kanë ardhur edhe 8 projektligje për shqyrtim në lexim të parë, nga të cilat 6 ndërlidhen gjithashtu me Raportin e Progresit.

Këto detyra, që dalin në prag të mbledhjes së 23 gushtit dhe të një mbledhjeje tjetër pas saj, nxitën kryetarët e komisioneve që në mënyrë të shkoqitur të flasin se deri ku kanë ardhur me shqyrtimet e amendamentimet e deritashme të projektligjeve, që sa më shpejt të procedohen ato për aprovim në Kuvend.

Në këtë takim u mor zotimi që deri në fillim të shtatorit të aprovohen së paku 13 projektligjet që dalin në Kuvend për shqyrtim të dytë.

Mbledhja e sotme kishte për qëllim që njëkohësisht të shihen edhe nevojat që kanë komisionet, sidomos sa i përket angazhimit të ekspertëve, për të kryer sa më shpejt amendamentimin e projektligjeve. /Telegrafi/