Lobimi strategjik

Presidentja Atifete Jahjaga, zëvendëskryeministri i parë Behgjet Pacolli dhe ministri i Jashtëm, Enver Hoxhaj, të ndihmuar edhe nga figura tjera të politikës vendore e ndërkombëtare, do të vihen në një mision diplomatik disamujor, me qëllim të shtimit të njohjeve të reja.
Në bazë të një strategjie për lobim të hartuar nga Ministria e Jashtme, e cila është në finalizim me disa sugjerime edhe nga Presidenca, burime qeveritare flasin për një angazhim të përgjithshëm si në nivelin e vendit, ashtu edhe në atë të miqve të Kosovës në botë që të realizohen vizita të shumta nëpër vende të ndryshme që nuk e kanë njohur Kosovën, me qëllim të bindjes së tyre që të ndryshojnë qëndrimin për pavarësinë e shtetit më të ri, shkruan Zëri.

Përveç presidentes, zëvendëskryeministrit dhe shefit të diplomacisë, në këtë angazhim pritet të përfshihen kryeparlamentari, deputetë dhe figura të tjera politike.

Përderisa strategjia nuk është ende përfundimtare, dhe nuk ka filluar operacionalizimi, zbatimi i saj, në Ministrinë e Jashtme nuk preferojnë shumë që të flitet zyrtarisht për këto aktivitete.

Por burime tjera flasim për një mision të ngjeshur diplomatik, ku do të përfshihen edhe figura ndërkombëtare, përfshirë edhe arkitektin e pavarësisë së mbikëqyrur të Kosovës, Martti Ahtisaari, i cili edhe në të kaluarën ka lobuar për Kosovën. /Telegrafi/