Dialogu dhe lobimi jo i mjaftueshëm ngadalësojnë njohjet

Dialogu Prishtinë - Beograd ka një ndikim të caktuar edhe në
procesin e njohjeve të Kosovës, thonë analistët. Sipas tyre, disa shtete
mund të presin për rezultatet që do të sjellë ky dialog, para se të
marrin ndonjë vendim për njohjen e shtetit më të ri.Ylli
Hoxha, nga Klubi për Politikë të Jashtme thotë se që nga shpallja e
pavarësisë, Beogradi ka përdorur në vazhdimësi strategjinë e vet, me të
cilën çështjen e Kosovës mundohet ta paraqesë si të diskutueshme dhe të
pazgjidhur. Ai përmend rastin e Gjykatës Ndërkombëtare të Drejtësisë dhe
dialogut që pasoi më pas, si pjesë të kësaj politike. Andaj, dialogun e
sheh si ndikues në ngadalësimin e dinamikës së njohjeve.
Ndërkohë, analisti Krenar Gashi nga KIPRED, thotë se mungesa e
njohjeve është më tepër rezultat i lobimit jo të mjaftueshëm nga ana e
Qeverisë. Ndonëse edhe Gashi vëren një ndikim të bisedimeve në procesin e
njohjeve, ai thotë se për shtimin e numrit të vendeve që do ta njihnin
Kosovën, nevojitet një politike më aktive. Ai thekson se ka disa
kategori shtetesh që pritet ta njohin Kosovën në të ardhmen.
Sipas Radios Evropa e Lirë, aktiviteti diplomatik i Qeverisë së
Kosovës në funksion të lobimit dhe njohjeve kritikohet edhe nga analisti
tjetër, Ylli Hoxha. Ai thotë se bisedimet mund t’i sjellin në fund të
vitit favore politike Serbisë, përderisa përfitimet e Kosovës, sipas
tij, mbeten diskutabile.
Deri më tash Kosovën e kanë njohur 75 shtete. Njohësit e së drejtës
ndërkombëtare thonë se Kosovës i duhen më shumë se 100 njohje për
anëtarësimin eventual në Organizatën e Kombeve të Bashkuara dhe
organizatat tjera. Ndërsa, pengesa më e madhe për Kosovën në këtë
aspekt, mbetet mosnjohja e saj nga pesë vende anëtare të Bashkimit
Evropian. /REL/Telegrafi/