Sinjale pozitive për njohjet

Ministri i Punëve të Jashtme i Republikës së Kosovës, Enver Hoxhaj thotë se ka marrë sinjale pozitive për njohje të pavarësisë së Kosovës nga disa shtete, por ai nuk ka folur për emra shtetesh e as për afate kohore për njohje, me arsyetim se mund të dëmtohet procesi.
“Unë po e jap maksimumin tim për të shtuar numrin e njohjeve për Republikën e Kosovës, mirëpo kur do të vijnë njohjet dhe nga cili vend do të vijnë nuk mund të flas tash. Është me rëndësi që kemi sinjale pozitive nga vende të ndryshme në pjesë të ndryshme të botës”, ka thënë Hoxhaj në një intervistë për Epokën e Re.
Ai, po ashtu, ka thënë se strategjia lobuese dhe dokumenti për politikë të jashtme nuk bien ndiesh me planin e Behgjet Pacollit.
Hoxhaj duke folur për vizitën në Vatikan ka thënë se ka punuar për shtatë javë për këtë vizitë.
“...Kjo është politika e jashtme dhe unë nuk mund të japë emra të shteteve se ku do të shkojë për të lobuar. Dëshiroj ta jap një shembull konkret. Unë për shtatë javë kam punuar për vizitën në Vatikan. Po sikur ta bëja publik këtë lajm, do të ndryshonin gjërat. Prandaj kjo është politikë e jashtme dhe është e kuptueshme që jo të gjitha gjërat bëhen publike. Duhet mirëkuptim për mua dhe punën time. Politika e jashtme nuk është kampionat i futbollit ku për orarin e ndeshjeve është i informuar i gjithë opinioni...”, ka thënë ndër të tjera Hoxhaj. /Telegrafi/