Stefanovic me bindje pozitive nga vizita

Shefi i ekipit negociator serb, Borislav Stefanovic, ka thënë se
vizitën në Kosovë e ka bërë me qëllim të mirë, dhe pa asnjë qëllim për
të provokuar.“Kishim biseda shumë të mira dhe mund të ju
them se në përgjithësi bindjet e mija për këtë vizitë janë shumë
pozitive, duke lënë anash problemet dhe protestat që ndodhen jashtë.
Fatkeqësisht disa njerëz ishin të lënduar dhe kjo është brengosëse. Këto
ngjarje duhet të shmangen në të ardhmen në marrëdhëniet tona”, ka thënë
Stefanovic në një intervistë për Radio Dukagjinin.
I pyetur se si ishte ndjerë pranë flamurit të Republikës së Kosovës
gjatë takimit me Edita Tahirin dhe Hajredin Kuçin, Stefanovic ka thënë
se kjo vizitë është përgatitur nga protokolli i tij, por nuk e ka parë
këtë vizitë si shtetërore.
“Për mua në tavolinë ishte vetëm flamuri i Serbisë dhe ai i institucioneve të përkohshme vetëqeverisëse”, ka thënë Stefanovic.
Ai shpreson se zyrtarët të institucioneve të Kosovës do të vizitojnë Beogradin.
“Unë gjithashtu e kam ftuar zonjën Tahiri dhe zotin Kuçi që të vijnë
dhe t’i vazhdojmë bisedimet në çfarëdo vendi, përfshirë edhe Beogradin.
Kjo ftesë është përsëritur disa herë dhe ne do të vazhdojmë ta bëjmë
edhe në të ardhmen. Ftesa është ende e hapur, do tu përkujtoj atyre në
vazhdimësi këtë ftesë dhe mendoj se është shumë e dobishme që të ulemi
dhe të bisedojmë jo vetëm në Bruksel por edhe në Prishtinë dhe Beograd”,
ka thënë ai.
Ndërsa i pyetur nëse do të kishte protesta edhe në Beograd, sikur
dikush nga institucionet e Republikës së Kosovës do ta vizitonin vendin e
tij, Stefanovic ka thënë se është i shumë i sigurt që nuk do të kishte
protesta.
“Askush nuk do t’i kushtonte vëmendje kësaj ndodhje sepse ne në
Beograd kemi takime me njerëz të ndryshëm, e njerëzit e shikojnë punën
dhe jetën e tyre dhe nuk i kushtojnë rëndësi gjërave të tilla . Të
gjithë e dinë, pos ekstremistëve në shoqërinë tonë se këto bisedime nuk
janë ndërmjet dy shteteve, kjo se çfarë ne po bëjmë është thjesht dialog
për të gjetur zgjidhje për shumë probleme që ekzistojnë dhe të
përmirësojmë jetën e qytetarëve të të gjitha etnive që jetojnë në
Kosovë”, ka thënë Stefanovic në intervistën për Radio Dukagjinin. /Telegrafi/