Vizita e Stefanovicit provokim

Kryenegociatori serb në bisedimet e drejtpërdrejta midis Kosovës dhe Serbisë, Borko Stefanovic, pritet ta vizitojë Prishtinën para raundit të katërt të bisedimeve, që do të mbahet kah mesi i muajit në Bruksel.
Mirëpo, analistë në Prishtinë vizitën e Stefanovicit e vlerësojnë më shumë si një provokim që ka për qëllim sfidimin e institucioneve shtetërore të vendit, se sa normalizimin e marrëdhënieve mes Kosovës e Serbisë, shkruan Zëri.

Yll Hoxha, drejtor i Klubit për Politikë të Jashtme e sheh këtë vizitë si një tentativë për të provokuar situatën, pavarësisht faktit se Qeveria e Kosovës është shprehur e gatshme për t’i dhënë leje Stefanovicit që të qëndrojë për vizitë zyrtare në Prishtinë.

Ai ka kritikuar Qeverinë e vendit, e cila sipas tij nuk po arrin që të vendosë një standard të sjelljeve të këtyre fenomeneve të vizitave të zyrtarëve serbë në Kosovë.

Ndërkaq, zyrtarë të subjekteve politike opozitare thonë se nuk janë në pozitë për ta ndaluar dikë që të vizitojë Kosovën, por janë kundër vizitave që keqpërdorin politikanët serbë gjatë vizitave të tyre në Prishtinë.

Pavarësisht kësaj, zëvendëskryeministri, njëherësh ministër i Drejtësisë, Hajredin Kuçi edhe njëherë ka konfirmuar se institucionet e Kosovës do t’i japin leje Stefanovicit për një vizitë zyrtare, por me kusht që ai të përmbahet nga përdorimi i fjalorit nxitës politik.

Ndërkaq, kryenegociatorja kosovare në dialogun Prishtinë-Beograd ka thënë se nuk ka ndonjë njoftim zyrtar për vizitë të mundshme të Stefanovicit.

Borko Stefanovic ka paralajmëruar një vizitë në Kosovë para raundit të katërt të bisedimeve. Ai ka deklaruar për mediat serbe se ka ndërmend të vizitojë Prishtinën për t’u takuar me ndonjërin nga “bashkëbiseduesit shqiptarë të Brukselit”. /Telegrafi/